Chondoni Amidzi

Mwaka wa 2017 mwezi wa hiri nabahathika kuonana na Masitori wa Wanje, mumwenga wa akuzi aa wira wa mkonyonyo ambolaye Muyuni. Masitori wanipa moro mure kuhusu wira uwo. Ndo namala niseme luhayo rero. Wira wa mkonyonyo uvinwa na ndonga, debe na firimbi. Vingine vidimazho kuhumika ni nzuga, bandika na mwingo. Wira uu ni here zaire ya ani Konjo wa Kolio ela ungeze debe gonya mayanga uipige porepore kiwela.  Mkonyonyo waanza mwaka wa 1984 ko Muyuni kwani Masitori. Mabwizanyo wa  Wanje kumbola Bamba Wacho were adzakwenda jema kwa haweye ko Muyuni ndo akifundhishwa ngoma ni aniMasitori. Akiuya mdzini na ufundhi, ndo wira uchenda nguma sehemu za Bamba ya Wacho, Jeshi na kungine.  Kulingana na Masitori, wira uu  waanza na mipigire tofauti,  ele ukigaluka galuka tha mara fungahe – ambaho ndo uriho vivi na ndo mwisho.  Masitori, ambaye dzinare ra kimagoma nde Majengo, ni mutili mukali sana ambaye ukimupa chausa anakumbozera wira haho kwa haho. Anamaira man...

Ukiamba maira ga Kigiriama, bai ni suthu umuhadze Konjo wa Kholio. Ndiye chamani kwa ufuti kwenye ga mautu. Kabahathisa; ni ‘kwe’ na ‘kwe’ kare! Sikiza thuwe dza uno wira uifwao ‘Nyama ya kun’vun’va’. Nyama ya kun’vun’va Nyama ya kun’vun’va ni ya kun’vun’va Ikangizwa vitunguu kumi lazima indanuka kuvunda  Nahenza nikueleze umanye  we mche mudzomba  Umurio wagoma  Richira ahoho  Bi Sirya were akinona  Angwiringwiri  Anahenza nipige muhuri  La mwenye tsenzi  Sina time yakugolola  chuma cha kapindi Bandari rirovulwa mufuko sihumira Kakuna henzo ra lazima  Mwenehu adzakala kinyanya muche Kiremba anafitsa nyuwi  Malindi wakudza  aboronge ahoho

Wira wa msego udzahenda mitsare; sirahisi kuwona kaheri.  Ela haho miaka ya sabini, themanini na hatha tisini, be were msego ndiwo wenye. Ngoi mbomu wa kwa msego were aifwa Katungwa (fusimone kaheri). Mgiryama yuyu were ni mutu na vituzhe kamare, mana were aremera nundu ho poti. Agiryama maamba ‘mutu yulikwa mbirani’; ela ndhumo ii kaizizire mtu dza Katungwa kudzilika mwenye bule. Namba 14 waimba  wira iye uifwao ‘Ninangulu’. Kivunyo sana bai.  Ninangulu Ninangulu Bi Konde Nazazigira mwenye mwiri wangu Mudzanimena ache  Mudzanimena we  Mukanimena ni bule  Mundatsoka Bi Konde mimi narya kibunda changu Ninwi munahenza kunimenawe Agiriama vizho kavindakala Mulungu kauzhenzi  Ninamera masharubu Mwana wa Konde Nzoni mdze mulole mugaone Munambire mundamanya Ikikala kadzanitsoma nagarichira tha gakale mabomu Nashukuru mwaka ni uu ndakala siriha kodi ya nyumba ...